العنوان مقرف مش كدة بس دة اللي حصل فعلا
كان أول يوم لعيد الفطر 2010 وكان عيد ميلاد اخويا الصغير وكان لسة راجع من الاعتكاف وجسمة مكسر من النوم علي الارض في الجامع 10 ايام
قولت اعمل مفاجئة واشتري تورته ومش عارفة ليه نسيت اشتري وانا راجعة من الشغل اتاري ده القدر بيقولي "المدعو احمد ابراهيم الدواء فيه سم قاتل"
وبعد ما رجعت وغيرت هدومي كمان أوووووووه افتكرت التورته طيب اعمل ايه اعمل ايه؟؟؟ اه اخرج تاني ما فيش حل غير كدة بكرة أول يوم العيد وكل المحلات قافله .. قصر الكلام خرجت تاني ولما وصلت لقيت ثلاجة التورت ممسوحة ما فيش فيها غير تورته كريمة وتورتة شيكولاته حجمهم صغير شوية.
قعدت اقول لورحي كريمة ولا شيكولاته ؟؟ شيكولاته ولا كريمة؟؟ الاثنين شكلهم مغري جداااااااااا ..... انت يا ... ممكن تلفلي الاثنين ايوة الاثنين يله علشان الثلاجة تبقي فاضية بجد.
خدت التورت ورحت البيت واخويا باس راسي وقالي كلام حلو ربنا يخليكي ليا وحوارات من هذا النوع هوا ندم بعد كدة بس مش مهم.
..........................
ومر الوقت بسرعة البرق واختي جت وجوزها وخالي وبقت لمه جبت العلب وفتحتها وانا بفتح علبه التورتة التانية بتاعتة الشيكولاته كان شكلها تحفة بس حسيت ان ريحتها مممممممممممم مش عارفة بس ريحة الشيكولاته مش زي عادتها.. المصيبة بقي هي ان كل الجماهير عايزة شيكولاته.وانا بصراحة كدة اول واحدة.
وبعد هابي بيرز داي تو يو
اخويا خد الطبق وأكل وشكلة كدة اتصدم وبعدها قعد علي الارض وهو بيبص ليا وكأنه بيقولي ليلتك مش فايته انا استغربت بس مش كتير لحد لما دقت التورتة انا كمان نزلت اقعد جنبه علي الارض اصل بصراحة التورتة الحمضانة ماينفعش تتاكل علي كرسي الانترية ولا الصالون لازم علي الارض اصل الصدمة ليها مفعول فظيع ما يتوصفش
الاول اقول الحمد لله ان الناس المهمة ماكلتش شيكولاته وأولهم بابا لانه كان هيفضحنا وخالي وجوز اختي عشان الفضايح ما هو مايصحش بردو.
نوران بنت اختي 4 سنوات يا حرام مش حاسة بحاجة فغيرت لها التورته من غير اي حد من الضيوف ما يحس اصل ما ينفعش افضح روحي واقولهم بالهنا والشفا انا جمعاكم انهاردة علي تورتة حمضانه.
ماما قالتي مش عايزة تورتة السكر علي بعد ما داقت واتصدمت وكان قرب يغمن عليها قعدت تنصح الناس من غير ما تقول بصراحة
كلوا كريمة ،،، كلوا كريمة ،،، كلوا كريمـــــــــــــــــــة
بس ما فيش فايدة
أنا : لاء يا ماما انا بحب الشيكولاته بصراحة مش عايزة حد يحس بحاجة. وانا من جوايا "أهئ أهئ أهئ التورتة حمضانة
اخويا: ازاي يا ماما دي تورتة فريده من نوعها اول مرة اكل تورتة شيكولاته بالطعم ده .. طبعا بيتريق
أختي : قالت ليا وهي مبتسمة ممكن تاني ... قولتلها ايه ؟ كريمة طبعا؟
قالتلي: انتي عبيطة طبعا شيكولاته؟
انا: يااااااااه انا واخويا وامي اكيد فينا حاجة غلط اختي بتقول التورتة تحفة.
انا قولت خلاص اختي ادمنتها وهتقول بعد كدة انا عايزة عيد ميلاد بتورتة حمضانة ولو سليمة هأجل عيد الميلاد لحد ما تحمض
وبعد ما لمينا الليلة وربنا سترها ما هو ربنا ستار حليم .... ما فيش حاجة كنت بفكر فيها غير يا تري التورتة حمضانة ولا بيتهئالي فأخدت اختي علي جنب
انا :بقولك ايه بصراحة كدة يعني ايه رأيك في التورتة
اختي : تحفة
انا : طيب والطعم
اختي : جميلة فعلا بس مش عارفة استطعم علشان عندي برد مش مخليني عارفة طعم اي حاجة
أاااااااااااااااااااااااه أااااااااااااااااااااااااه ياني ياما
أهئ أهئ أهئ يبقي التورتة حمضانة
كنتي الامل الاخير وهدمتيه
الاهم من ده كله واللي كنت قلقانه عليه فعلا هو مصير الباقي من التورتة
.....
ياتري فين فين فين؟؟؟ الزبالة لالالا لا عيب كدة ----- الشارع ؟؟؟ لالا لا لا دي تورتة بردو وشيكولاته
امال فين ؟؟؟
مش عارفة
صحيت الصبح ادور علي التورتة مش لقيها
سألت ماما قالتي ولا اعرف
يا بابا : انا اعرف منين انا مابكلش الشيكولاته
بصيت له بنظرة حقد ------وقولتله في بالي يا بختك-------
سألت اخويا: قالي اتخصلت لك منها قولته ازاي؟؟؟؟؟؟؟؟؟
قالي بصراحة كدة كلتها
أيه!!!!!!!!!!!!!!
وبأعلي صوت قالي..
بصراحة احلي تورتة حمضانة كلتها في حياتي
!!!!!!!!!!!!!!!!!!
وفي النهاية
خليك جرئ واعزم حبايبك علي تورتة حمضانة
عك وربك يفك
ربنا ستار حليم
